A DINU GRAMMATICU

È veru! S’astutàu ddu granni faru
chi desi forti lustru a stu paisi,
tanti angiuliddi lesti l’atturniaru,
un cherubinu supra l’ali ‘u misi.

E lesti s’‘u purtaru fina ‘n celu
tra li scinziati, prufissura e merici,
cca, canusciutu, pi bravura e zelu,
st’omu ‘mpurtanti ‘ntisu: “Dinu D’Erici”.

Appena fu davanti a lu Signuri
s’addinucchiàu e si misi a li so’ peri:
è stidda, ormai, lucenti a tutti l’uri,
cumincia un novu tempu senza aeri.

Ora, suvrasta, Dinu, li pianeti
cu lu so fari sempri onestu e finu,
manna ‘na musa a tutti li pueti
letu li fa puitiari di cuntinu.