A ME PATRI

Primu Nuvembri festa d’ogni Santi,
mi talìi, ma nun dici ‘na parola,
mentri, papà, jò sugnu cca davanti,
lu ciuri friscu certu ‘un ti cunsola.

Nun sugnu nuddu, nenti pozzu fari
pi nèsciti di chistu locu scuru,
chi m’arristàu? La pena e lu prijari!
Ah! Si putissi rumpiri stu muru!

E tu, chi tantu amavi la campagna,
lu cantu di l’aceddi e la natura,
truvasti puru ddocu la cumpagna.

E si ti pensu nta dda sardatura,
lu chiantu dintra l’occhiu mi ristagna,
d’‘a pena chi lu cori mi turtùra.