AMURI

T’amu!
E si ‘ncatinanu du’ cori,
‘na sula parola:
“ciatu d’amuri”.
Sta parola tantu nicaredda,
fatta di focu ardenti,
chi, certu, ‘un’è faidda,
‘n celu nun viri nuvuli
ma suli, luna e stidda.
Iddu cuva sutta ‘a cinnìri
finu a pirciari lu pettu,
la notti arrobba lu sonnu
chi smània dintra ‘u lettu.
E tannu nun c’è scampu,
chissu si chiama amuri!
Amuri chi si ‘ncodda cu ‘i pinseri
si senti cu lu palpitu d’‘u cori,
amuri chi duna e leva vita,
chi nun canusci tempu,
nè abitu di sita.
Amuri è chiantu e puru cuntintizza,
russiàri pi ‘na semplici carizza
sèntiri nta ‘u ‘mmernu càuru d’estati
mentri lu cori duna martiddati;
sèntisi li chiù ricchi di lu munnu,
aviri la vista
e nun vìriri nuddu ‘ntunnu.