L’ALAVO’ DI LA LUNA

Sta notti,
di matri mi fa la luna
chi sta affacciata
di la so tirrazza,
idda di la notti è la patruna
e mi talìa
e mi pari chi m’abbrazza.
L’occhi tegnu aperti,
sviatu lu sonnu,
nta la finestra c’è ‘na spilazzedda,
pinseri nta la menti
vennu e vannu,
spanni la so luci
sta luna a fedda.
Chiossai di la metà
ci ni mancava,
nun era tutta china
e parìa ‘na naca;
chiamàu ‘na stidda
mentri chi jucava,
fa cogghiri ‘i pinseri
e mi l’annaca.
Iddi, araciu araciu
vannu allintannu
e l’occhi ora si chiùrinu
a sì e no:
“mi sentu picciridda
comu tannu
mentri la luna
mi canta
l’ALAVÒ”.