PRIMU NOVEMBRI

Era la sira di tutti li Santi,
darrè la finestra cu ‘i me’ pinseri,
la testa mi pisava: eranu tanti,
puru ‘a luna, quasi tunna, era ‘n peri…

…e facìa di dda supra affaccia e codda
tra nuvulicchi comu mattulidda,
lu ventu chi ci dava corda modda:
“mi ficiru turnari picciridda”.

Pinsannu a dda magica siritina,
aspittava chi arrivassiru li morti;
l’occhi chiusi, p’‘u scantu d’‘a quacina
ma quarchi ucchiata dava tra li porti.

Lu ‘nnumani, cu’ ‘i me’ soru, a circari
sutta ‘u lettu, nta ‘u comò o ‘a culunnetta;
battìa ‘u cori, nun si putìa firmari
e si circava stannu sempri “allerta”.

Poi, finalmenti, un piattu senza stemma,
‘na pupa di zuccaru e marturana;
piattu cunzatu di lu conzalemma,
gonna di lenci, cammisa baggiana.

Nuci, castagni, puma e ficu sicchi
e quanta cuntintizza dda matina;
li giocattuli eranu pi li ricchi,
sulu pi chiddi cu la sacca china.

Nta ‘u cori ‘ngenuu di li piciriddi
‘na granni luci china di spiranza;
satannu cuntenti comu ariddi
pi ddu picca truvatu nta dda stanza.

Puru s’‘u matarazzu era di “crinu”,
curcati testa e peri nta lu lettu;
la ciocca dava un’occhiu a ‘u puddiccinu
tinennusìllu sempri strittu ‘n pettu.