UNNICI SITTEMBRI

Li du’ gimelli turri, du’ minzuddi,
lu vantu granni d’ogni americanu,
cu tanti uffici, carta, pinni e puddi,
squagghiaru nta un mumentu a manu a manu.
Fu comu un lampu, chiddu a l’impruvvisu,
sutta lu celu chiaru sittimbrinu,
un macabunnu sempri chiù dicisu
rumpìu dda turri comu un manichinu.
Di dd’apparecchiu ‘a soru appi ‘na botta,
carìu cu gran duluri puru idda;
si spannicàu chiù peggiu d’‘a ricotta
cu tanta genti e quarchi picciridda.
Quantu pirsuni ‘n cerca di riparu
sculannu comu torci senza peddi,
tuttu fu veru, nun si lu sunnaru,
vularu ‘n celu ‘nsemi cu l’aceddi.
Chini di fumu, sangu, purvirazzu,
lavati foru d’acqua biniritta;
pir iddi Diu livau lu catinazzu,
si misi a ‘u ciancu tutta dda minnitta.
E dicu a forti vuci a ogni guvernu:
“firmati sta gran fami di putiri!”
Lu munnu ‘nteru è d’‘u Patri Eternu
è iddu chi fa nasciri e murìri.