DIFFIRENZA
(a l’AVIS)

La manu appuntiddata a la mascidda
davanti a la finestra a l’aria pura,
mentri, nta ‘u celu scumparìa la stidda,
s’arruspigghiava araciu la natura.

E si dumanna sempri chiù la menti:
“chi differenza c’è tra ‘n omu e ‘n omu?”
E si smirudda, ‘u cori ni risenti,
la differenza c’è ma ‘un sacciu comu!

Pensu a l’Avis, sta granni Associazioni,
chi cogghi sangu, ‘u duna a li malati;
cu amuri veru e tanta di passioni
dànnu l’aiutu a chiddi sfurtunati.

Amentri si travagghia pi la vita
e sullivari tanta suffirenza,
a ‘n àutru locu, manu ‘nvipirita,
la leva nta un minutu e nun ci pensa.

Mentri ddu sangu va siccannu a ‘u ventu,
chianci ‘na matri ancora a cori ruttu;
dintra lu pettu c’è lu gran turmentu,
puru lu celu arrè si vesti a luttu.