COCCIA DI SIMENZA

Quannu chi arriva ‘u jornu d’‘a partenza
taliàti l’occhi a ‘i nonni siciliani,
chiàncinu e chi cercanu? Climenza!
P’aviri sti niputi ogni dumani.

Appena su’ arrivati, cuntintizza!
Nun ci su’ acciacchi, pàrtinu a du’ botti
e tanti voti ‘na sula carizza
li fa turnari giuvani, picciotti!

Di sti niputi essennu ‘n luntananza,
li nonni cu ‘i pinseri ‘un stannu sori;
mentri lu tempu passa e l’età avanza
chiù forti si fa ‘a pena nta lu cori.

Guvirnanti chi siti a lu putiri,
pusati ‘a manu supra la cuscenza!
Forsi ‘un sapiti soccu veni a diri,
disiàri sti gran “coccia” di simenza.

Tutti li jorna fazzu ‘na prijera
pi dumannari aiutu a tutti ‘i Santi
e svintuliàri leti la bannera,
livannu prestu ‘u puddu: “d’emigranti”.