L’ULTIMU CIATU

La fimmina ci l’appi stu gran donu
d’addivintari matri dannu amuri,
rigina è pi li figghi supra un tronu
e li difenni certu a tutti l’uri.

E’ pi stu granni amuri canusciuta
ma a voti, lu so cori è spirtusatu,
di quannu ‘a mala sorti, ‘a chiù puntuta,
ci duna un picciriddu anticappatu.

Mi pari picca la parola “matri”,
jò cercu ‘n aggettivu chiù apprupriatu
ma nenti trovu e pregu a nostru Patri
d’alliggiriri ‘u cori adduluratu.

E mentri squagghia l’ogghiu d’‘a so lampa,
ci duna ‘u triplu affettu e tantu aiutu,
lu corpu si lu senti nta na vampa,
assuppa ‘u pettu lu so chiantu mutu.

Eterna, sì, vulissi idda ristari,
passa lu tempu cu l’agghiorna e scura
e si smirudda a cu lu po lassari
quannu si fannu friddi li surura.

Chiurennu l’occhi, l’ultimu so ciatu,
lu sparda pi stu figghiu sulamenti
e dopu sta gran cruci chi à purtatu
l’affida â manu di l’Onnipotenti.