MAGICA PAROLA

Dda dintra lu scrignu d’‘u cori
si trova ‘na perla assai rara,
sarvata tra ‘i megghiu tisori:
“lu figghiu, la cosa chiù cara!”

La matri ci duna l’amuri
appena tagghiatu ‘u vureddu,
si scorda li stenti, ‘u duluri,
s’abbrazza lu so bambineddu.

Di certu ci su’ sacrifici
pi crìsciri sanu ‘u figghiolu
e puru si quetu e filici,
criscennu poi pigghia lu volu.

Ma ‘n mezzu d’‘u cori cusutu
l’amuri p’‘u figghiu ci resta
puru si stanca duna l’aiutu,
lu ripara d’ogni timpesta.

Si porta ‘n coddu ogni lamentu,
cu ducizza asciuca lu chiantu,
teni appressu sempri ‘u so ‘nguentu,
metti tuttu sutta ‘u so mantu.

Matri, ma chi bedda parola,
già sulu chiamarla cunorta;
ed idda, chi certu cunsola,
pi junta lu fa dopu morta.

La matri, l’amuri chiù veru,
l’amica chi ‘un duna mai feli;
di ‘n pettu ‘u so cori è sinceru,
è duci, chiù duci d’‘u meli.