CORI DI MATRI

Si senti ‘n funnu d’un puzzu surgivu
lu cori di ‘na matri e lacrimìa
quannu, un figghiu p’un fiaccu mutivu,
cu certi paruluna lu struppìa.

Dintra stu vecchiu pettu quantu peni
chi martiddìanu suli e a l’ammucciuni,
di nicareddi, idda, è ‘u sulu beni,
criscennu, poi, la mèttinu a l’agnuni.

Spissu, pi gilusia, tra iddi frati
o puru pi ‘na frasi malantisa,
s’attrovanu nimici e su’ sciarriati
e pi na matri tuttu chistu pisa.

Saggia, la matri, agghiutti e metti ‘n panza
puru si lu vureddu si ci sbota,
s’affida certamenti a la spiranza
e torna a pirdunarli ‘n’àutra vota.

E idda, pi nun spàrtiri ‘a famigghia
mentri chi ‘a testa reggi e nun ci sfasa,
paroli duci d’‘u so cori pigghia
e a tutti li so figghi li travasa.

Li figghi chi nun legginu nta ‘u cori,
nun ponnu mai capiri dda firita
purtata dintra finu ch’idda mori
e, forsi, puru quannu è a l’àutra vita.