LU ME NOMU

Essennu ch’era ancora picciuttedda,
nun capìa la ‘mpurtanza di stu nomu
e turmintava a me matri, puviredda,
chi mi spiegava lu pirchì e lu comu.

Jò sugnu, matri, la to prima dogghia,
“dunni mi vinni stu nomu lariu?”
Nun sugnu pianta di granni fogghia,
mancu taliasti lu calannariu?

“Stu nomu, figghia mia, ‘u purtau to nonna,
idda, chi a so vota lu ereditàu;
nun ci fu Santu né nudda Maronna
di mettitìllu m’‘u raccumannàu!

Stu nomu, nica, paci voli diri
e servi puru pi magnificari;
a Gesù na gran fudda, si mi criri,
cu ‘i parmi ‘n manu ‘u vosi fistiggiari”.

E foru sti paroli assai efficaci,
biniricu cu porta ‘u nomu miu,
pi nun siccari st’arvulu di paci
dopu chi sugnu morta puru iu.