LI DU’ FINESTRI

A la finestra si stava affacciata,
cu lu sguardu luntanu e pinsusu;
cori sirenu e la vesta puntiata
pensa ‘a fatica di l’amatu spusu.

Lu megghiu vonnu dari a stu nuzzenti
chi dormi biatu dintra la so stanza,
spardannu surura a mari e a li venti
ma teni nta l’arma ricchizza e spiranza.

Lu picciriddu già è arruspigghiatu
cerca, currennu, d’‘a matri li vrazza
strica ‘i manuzzi nta l’occhi ‘nsunnatu,
idda lu strinci, cu forza l’abbrazza.

Magicu minutu d’amuri e di ‘ncantu,
‘n facci, ‘na fimmina puru affacciata,
taliava cu l’occhi chini di chiantu
dda matri leta, d’‘u nicu vasata.

E batti forti ‘u pettu cu gran pena,
idda chi pusseri tanta ricchizza,
senza paroli davanti a dda scena,
disiassi d’un figghiu ‘na sula carizza.