FIMMINA

Un jornu Diu, pinsannu seriamenti,
chi l’omu senza fimmina ‘un po stari,
c’‘a manu so divina comu nenti,
la stampa e a ciancu ci la va a pusari.

Si l’addistrau lu Diu a so piaciri
ma l’omu, sintènnusi chiù forti,
la fimmina trattava a ‘u so vuliri,
facennu di sicuru cosi storti.

Chiamata sulu a nutricari ‘a proli,
cunsidirata senza ciriveddu,
nun c’era largu pi li so’ paroli
e muta s’annacava ‘u nuzzinteddu.

Ricanusciutu ‘un era ‘u to valuri,
vinivi, puru, spissu, maltrattata,
ma tu, facennu lotti a tutti l’uri,
ora, si, certamenti, rispittata.

E poi t’arriva chiddu chi aspittavi:
chi l’omu nun ti fici chiù ‘u patruni,
li suffirenzi, certu, di li to avi,
li riscattasti, ‘un stannu chiù a l’agnuni.

Nesci ‘a matina e vai a travagghiari,
‘n ogni travagghiu, veni ormai apprizzata;
‘n pulitica sai, certu, cumannari
e tanti voti, puru, si scinziata.

Pi l’omu, ‘i tempi, nun su’ chiù li stessi,
tu ti pigghiasti tutti l’arritrati,
ci calculasti puru li ‘ntiressi,
e fai ‘a “signura” dintra e strati strati.