MILLI LIRI

Talìu ‘n fotugrafia sti milli liri,
mi veni ‘n menti ‘u tempu già passatu;
di quannu tra li stenti e lu patiri
un sordu, certu, chi vinìa sguittatu.

Li suravanu si setti cammisi
e travagghiannu sempri a leta cera,
pi varagnari milli liri a ‘u misi
e la pignata supra ‘a spiritera.

Ricordu ancora puru ‘u so culuri,
a centru li du’ fimmini ‘mpurtanti;
cu qualchi fogghiu rosa, lu sapuri
vi l’assicuru ch’era d’un rignanti.

Stamu ora a taliari sta munita
e tutta ‘a minuzzagghia chi ni duna,
di certu, st’euru, ni canciàu la vita,
si tira avanti a via di trantuliuna.