TURRI DI LIGNY
(dintra lu quatru)

Dintra stu quatru di russu curaddu,
la vecchia turri ni fa ricurdari
lu sonu d’‘a campana, ‘u cantu d’‘u addu
e ddi scogghi pi putìrici jucari.

Varcuzzi di lanna eranu varati,
tutti leti cu li cori fistanti,
cu li cumpagni di la virdi etati,
a “barracchedda” o a “Santu Libiranti”.

Idda, maistusa, cu la so pacenza,
taliava leta tutti ‘i picciriddi;
si ni priava di tanta ‘nnuccenza,
la sira ni parlava cu li stiddi.

Passau ‘u tempu, su’ tutti sparpagghiati,
si ficiru granni, ànnu figghi e mogghi;
ognunu a la so casa assistimati
ma nuddu si li scorda li to’ scogghi.

Nta ‘i capiddi qualchi filu d’argentu
e tu, sempri chiù bedda ‘n mezzu ‘u mari;
li saluti c’un ciuciuni di ventu,
tutti ‘i voti chi ti vennu a truvari.