TRAPANI TERRA DI SULI E SALI

Gemma priziusa d’‘u mari lavata,
terra amurusa cu figghi sinceri;
bedda ciurera d’‘u suli vasata,
su’ lu to vantu li “Sacri Misteri”.

Cu vrazza vagghiardi, li marinari,
raccàmanu riti nta ‘i marciaperi,
cu luci di stiddi vannu a piscari
e lu pinseri a matri e a la muggheri.

E’ genti a la bona, travagghiatura,
chi preja Santi, Signuri e Maronna,
chi ‘u vinticeddu ci asciuca ‘i sudura
e chi la varca so carrica torna.

Bianchi linzola a lu suli su’ stisi,
poi diventanu muntagni di sali;
nta la staciuni, nta ddi càuri misi,
cu forza di pusa e carizzi di pali.

P’arriparari, sti bianchi muntagni,
di ciaramiri ci fannu ‘u cappottu;
fattu a misura, livannu ‘i macagni,
cu arti cusutu d’‘u vecchiu e ‘u picciottu.

L’anticu mulinu misu è di latu
e ‘n facci a lu ventu chiù nun firrìa;
d’‘i ziti e turisti veni ammiratu,
purtannulu appressu ‘n fotugrafìa.