MARI

Talìu ‘ncantata jò stu beddu mari
e comu ‘nnamurata batti ‘u cori,
cu forza batti, nun si po frinari
senza stu ciatu, pensu, chi si mori.

Essennu calmu, iddu, è veru beddu
e fa di specchiu pi lu suli e ‘a luna,
vasatu puru di lu “biancu aceddu”
e li varcuzzi ‘ntunnu pi curuna.

Iddu pi mia è comu un moddu lettu
dunni ci posu tutti li pinseri,
dunni ci trovu paci, lu risettu,
e a li voti ‘a forza a stari ‘n peri!

E mi disiassi essiri un gabbianu,
putiri stari ‘n menzu ‘i so’ biddizzi,
pusata supra ‘u scogghiu chiù luntanu
e notti e jornu aviri ‘i so’ carizzi.