CURADDI DI MARI

D’‘a me finestra a sira e a la matina
pozzu taliari sempri lu to regnu,
sia quannu un filu d’arca ‘un si rimina
o quannu ‘a scuma lassa un leggiu segnu.

Stannu accussì vicinu, facci a facci
ni canuscemu ‘i pregi e li difetti,
cu tia jò mi cunfiru senza ‘mpacci
e tu canusci tutti ‘i me’ prugetti.

Ch’è bedda l’acqua tua, ch’è trasparenti,
sguizzanu ‘i pisci, affaccianu la testa;
si tavula cunzata senza ‘i venti
e ‘n celu e ‘n terra a tutti banni è festa.

Ma quannu chi t’annervi, ‘u to culuri
stracancia tuttu, cancia lu to aspettu,
‘nnuccenti tu l’ammazzi cu fururi,
nenti capisci! Pi nuddu rispettu!

C’è chiantu di figghi, sòggiri e nori,
sunnu d’‘i matri li lacrimi amari;
stizzi di sangu sprimuti d’‘u cori
sicchi, poi, sunnu “‘i curaddi di mari”.