ERICI

Mi pari comu un re ‘n tronu assittatu
cu tanti luci ‘n testa pi curuna;
sutta stu celu, di tanti ammintuatu,
pi dari forza a ‘u lustru di la luna.

Stasira cu giugnettu già finutu
va ‘n cerca d’aria frisca ogni pirsuna;
lu ciuri pari siccu e ammusciulutu,
puru iddu cerca ‘u ventu e ‘i so’ vasuna.

Taliànnuti pensu a la to friscura,
a ‘i to’ biddizzi e quantu si ‘mpurtanti;
di tuttu ti dutau matri natura,
locu di scienza, munasteri e Santi.

Quannu l’autunnu lentu s’avvicina,
c’‘u tempu chi addiventa annigghiateddu,
“Vèniri”, la bidduna dea ericina
ti teni d’occhiu dintra lu casteddu.