LA VALIGIA DI CARTUNI

Paria avissiru finutu
ddi tristi tempi:
“valigia di cartuni
attaccata cu lazzu”;
‘nveci vaiu virennu
su’ chiddi di sempri!
Supra vaguna di lignu,
pani e tumazzu;
chinu lu cori di duluri
e spiranza
‘nchiusi nta ‘u pettu
c’un gran catinazzu.
L’amuri d’‘a famigghia
tinutu a distanza
e partìa l’emigranti
a circari furtuna:
“chianci dda matri
nta ddu pirtusu di stanza;
amminazza sta terra
chi sirvizzu nun duna”.
Talìa lu ritrattu
supra ‘u cantaranu,
spissu cu l’occhi russi
nun fa chi prijari;
spinna notti e jornu
pi stu figghiu luntanu,
s’addisiassi aceddu
pi putirlu abbrazzari.
Ora li valigi su’
di peddi raffinata
e cu l’apparecchi
li viremu vulari,
pirchì si parti ancora
di sta terra amata,
purtannusi appressu
li chiù beddi ricordi,
dda, dunni lu suli è raru
e l’aria annigghiata,
dunni s’agghiutti feli
pi quattru sordi.
Tu, isula mia,
ti senti cunfusa?
Nun pensi a sti figghi
sutta ‘n’àutra bannera?
Tu, matri amurusa,
soccu poi fari,
p’avilli ‘ntunnu
nta sta ciurera?
E’ veru chi lotti,
cuntinui a spirari,
di dari a tutti
sti figghi lu pani,
d’‘a stessa maidda
e leta leta
Sicilia cantari
e luciri comu
nta ‘u celu la stidda!