NATALI DI L’EMIGRANTI

Lu figghiu to è gran travagghiaturi,
luntanu di tia, ‘u sai, chi spinna e mori;
tra negghia e nivi sparda lu suduri,
ti pensa spissu, squagghia lu so cori!

Bedda Sicilia mia, chi si po fari
pi tèniri sti figghi a li to’ peri?
Di lu to suli nun l’alluntanari
e mancu di li matri e li muggheri!

Stanchi li vrazza pi li tanti stenti,
prejia lu Supremu sutta ddu nivali
mannànnuti lu cori so scuntenti.

E quannu arriva ‘a festa di Natali
talìa lu celu d’àutri cuntinenti,
pi stari cu tia s’addisiassi l’ali.