SICILIA

‘Na matinata Diu nta ‘u firmamentu,
jucannu tra li nuvuli c’‘a luna,
si misi ‘n testa di jiri appressu a ‘u ventu
pirdennu, nta la cursa, la curuna.

E persi li smiraldi e li rubini
e tuttu chiddu chi di ‘n capu àvia,
si trasfurmaru ‘n arvuli e jardini,
di dunni poi nascìu sta terra mia.

Sicilia mia, li to’ biddizzi rari
li teni supra un virdi fazzittuni,
n’agghiutti puru vuccunati amari,
la rabbia vugghi sutta ddu “cufuni”.

Pinsannu certu a ‘i figghi to’ luntanu,
chi stritti stritti nta lu cori teni,
dda, dunni sunnu misi a lu stramanu
ci manni li spiranzi e lu to beni.

Sicilia, tu, chi ci ài li spasimanti,
china d’aranci e puru di limuna
e cu stu suli to fidili amanti,
tu si rigina, tu si dda “curuna”.