PARADISU ‘NFANGATU

‘Na vela smeraldina ‘n mezzu ‘u mari
di tuttu ‘u munnu veni curtiggiata,
lu focu d’‘u vulcanu ‘a fa quariari,
ci duna, ‘u ventu, ciatu e ‘n’annacata.

E lu prufumu di li so’ jardina
svapùra finu a l’àutru cuntinenti,
lu suli, ‘a luna e tutta dd’aria fina
ni fannu un paradisu veramenti.

Mi smacinìu la testa e li pinseri
mi vannu a chiddi chi la vonnu mali,
li stessi figghi d’idda su’ traggeri
chi ‘n pettu ‘un ànnu cori né idiali.

La “mafia” certamenti fa tirruri
e â fattu virgugnari ogni omu saggiu,
culpisci vilinusa a tutti l’uri
e di sta terra voli l’appannaggiu.

E pregu addinucchiuni nostru Diu
pi stu gran ciuri, pi stu gran jardinu
e pregu pi canciari lu bulìu
a chiddu chi si senti malantrinu.

E speru chi Natali ni la sana
a tutti sta firita, stu gran neu
e chi ogni sonu duci di campana
dassi spiranza dintra ‘u cori meu!