LA GRANNI PUTÍA

Ch’è granni la putìa di la natura
quannu si stenni tutti li tappita,
li metti ‘n mostra cu li so’ culura,
è un quatru strabilianti di la vita.

L’appizza nta ‘i timpuna e nta li chiani
e idda, essennu bedda e assai baggiana,
tutti li petri cu li furmi strani
li sfoggia cuntintuna pi cullana.

La sira, quannu lentamenti scura,
sunnu ‘i sirpuzzi ‘n cerca di li tani
pirchì lu quatru canciàu li culura
e luna e stiddi fannu li vardiani.

L’aceddi, essennu stanchi di vulari,
tornanu ‘n flotta ‘n cerca di l’aniri
sbattennu l’ali vannu a ripusari
e la natura leta si ni riri.