VIAGGIANNU

Supra ‘i binari di la ferruvìa
passannu ‘n cursa li vallati e mari,
lu suli è forti, l’occhiu mi sbiddìa,
però ci curri appressu pi taliàri.

La terra, cca e ddà, è bedda priparata,
aspetta l’acqua a maturari ‘u fruttu;
virdi dd’aliva duna ‘n’affacciata,
a dritta e a manca viu ch’è beddu tuttu.

Lu marinaru stancu tira ‘a rizza,
vagghiardu sta e cu l’occhiu nta la via,
lu celu cu lu munti s’accarizza
comu fa spissu c’‘a me fantasìa.

Passa Casteddammari e Balistrati
e si cuntinua sempri a caminari:
rari biddizzi, pàrinu ‘ncantati
e cercu lu me sguardu di firmari.

«La terra tua è tutta ‘na ciurera!»
Mi dissi lu turista: «è cosa rara!»
L’àviti cca l’eterna primavera
e bedda pari puru la zabbàra.