PARLANNU CU LU ME DISTINU

Mi vinni assira la malincunìa
e cu la rabbia dissi a ‘u me distinu:
“pirchì, dimmillu, tu ci l’ài cu mia?”
Chiancennu m’abbrazzai lu cuscinu.

Appena nuzzintedda e fu turmentu!
Tu nun mi duni paci né risettu,
mi sentu comu rosa ‘n facci a ‘u ventu,
cu ‘na pungenti spina nta lu pettu.

Però, jò, essennu un tipu battaggheru,
statti sicuru chi ‘un t’‘a dugnu vinta,
mi cogghiu li me’ forzi e pi daveru
jò ti dimostru tutta la me “grinta.”

Nun ci pruvari chiù, ti raccumannu,
abbrucia di la menti sti pinseri,
lèvala sta ramigna chi fa dannu
e metti l’erva frisca a li me’ peri.

L’unica cosa, sai, chi mi cunsola
e lu ripetu sempri a tutti l’uri,
sippuru ‘u tempu curri e si ni vola,
lu me cunfortu è unu: “lu Signuri!”