PALUMMEDDA

Biata sta palumma bianca e bedda
chi vola nta l’ariu e fa lu va e veni,
jò ti taliu essennu picciuttedda,
tu, certu, nun capisci li me’ peni.

Sugnu assittata ‘n capu sti du’ roti
e ‘nveci, tu palumma, poi vulari,
cu l’ali aperti ‘n celu ti rivoti
comu ti piaci e quannu chi ti pari.

Ti vennu appressu l’occhi e lu me cori
di quannu voli a quannu t’à firmari,
li me’ pinseri ‘un su’ pi nenti sori:
“leta e scuntenta restu jò a taliari”.