TURNAU LA PRIMAVERA

Tra li staciuni tu si la rigina,
di tanti ciuri porti la curuna;
l’aceddi leti cantanu ‘a matina
nta ‘u celu mentri chi s’ammuccia ‘a luna.

Vulannu, iddi, ti firrìanu ‘ntunnu
chi pàrinu anciuliddi a ‘u to cumannu;
portanu ‘a bona nova nta lu munnu,
lu ventu leggiu leggiu va ciatiannu.

Cu duci miludia pi longu e largu
vannu dicennu a tutti a leta cera:
“lassàti li tanuzzi d’‘u letargu
armali me’, turnau la primavera!”

E mai si stanca ‘u suli di vasari
sta facci, li to’ ciuri cu li fogghi;
finu â tarda, quannu si va a curcari
supra lu mari chi accarizza ‘i scogghi.