LA MUSCA PRIGIUNERA

Dintra un vitru trasparenti
vitti un puntinu niuru
chi si muvìa;
curiusa m’avvicinai a passi lenti:
era na musca priggiunera
dintra na bunnìa.
Smaniàva, cunfusa, piatusa,
mi prijava dispirata
pi essiri libirata.
Propriu a mia?
Chi mai l’aiu suppurtata?
Mi fa divintari nirvusa
pi quantu è fastidiusa!
Ma lu me cori nun potti suppurtari
la so agunia;
decisa ci detti la libertà
aisànnu la bunnìa.
Idda attornu vulau tutta leta,
ah!... Si tutti avissiru cori di pueta!
Nenti mafiusi o puru camurristi
e mancu brigatisti;
tutti ‘nsèmmula essiri cunfusi
cu amuri e fratillanza
comu mitalli fusi.