L’ANEDDU

Esti un cerchiettu di ferru filatu
cu tanti naccareddi tutti russi,
lu tegnu caru, ‘nfatti, l’aiu sarvatu
comu si d’oru o di curaddu fussi.

Fu certu, pi mia, ‘u rigalu chiù beddu
sippuru scarsuliddu è ‘u so valuri,
mi l’accattau me figghiu Pippineddu
cu la sincerità d’un veru amuri.

La menti spissu torna arrè a dda sira:
“fu grossa spisa pi la so sacchetta,
jò ci avìa datu sulu quarchi lira
pi la simenza cu la caccavetta”.

‘Nveci, iddu, fici bona la pinsata:
si ferma lestu nta ddu bancareddu
cu lu pinseri a mia ch’era malata,
di cursa vinni e mi purtau st’aneddu.

Perciò, cuntrollu sempri stu tisoru,
lu vogghiu misu appressu quannu moru!