LI VECCHI

Vìrinu addivintari ‘a testa bianca,
nun c’è chiù forza e mancu chiù valìa,
araciu araciu la saluti ammanca:
cumincia pi li vecchi l’agunìa.
Di còllira lu cori si ci pigghia,
pinsannu chi nun su’ chiù boni a nenti;
si riunisci tutta la famigghia,
qualunqui dicisioni, “strinci ‘i denti”.
Si spàrtinu ogni misi li dinari
chi pìgghianu pi l’accumpagnamentu;
di vota ‘n vota capizzu di canciari,
lu pèrdinu spissu l’orientamentu.
E…l’assettanu queti nta ‘n agnuni,
iddi, è veru, dunanu a strulichiari
però lu cori chianci a l’ammucciuni
quannu chi si sèntinu amminazzari.
Pensanu sempri a la so picciuttanza,
quannu cu ‘i manu jisavanu balati,
quannu a tutti jinchìanu la panza
misi di latu ora e abbannunati.
Ci su’ poi, chiddi, li chiù sfurtunati
senza perdiri tempu, cu primura,
essennu li figghi beddi ‘mpiegati,
li vecchi portanu â casa di cura.
“Dda ci su’ li duttura, li ‘nfirmeri,
sempri prisenti siddu v’ammalati,
cu li cumpagni scanciati pinseri
e nta ‘u jardinu li beddi passiati”.
E mentri lu figghiu allarga li vrazza
quannu li va a truvari pi qualchi ura,
nun pensa chi po usari ‘a stessa tazza,
lu stessu lettu dunni friddu sura!
Iddi, li saggi, nun fannu capiri,
chi attrassatu lu cori un po quariari;
sulu a Diu oramai tennu granni firi
chi cu la morti ‘i veni a libirari.