FORZA SPICIALI

La forza di la puisia è spiciali,
fa junciri pirsuni di luntanu;
volanu comu aceddi senza l’ali,
arrivanu a ddu locu a manu a manu.

E vennu p’ascutari li paroli
chi lu pueta canta a leta cera,
amuri, fratillanza, chissu voli
e stari ‘nsemi comu ntâ ciurera.

E ‘un aviri né gilusia o cunfrunti
tra l’allittrati e cu avi picca scola;
cu la sincerità stampata ‘n frunti
e chidda amurusanza chi cunsola.

A mia, chi piaci puitiari tantu,
paroli chi accarizzanu lu pettu,
sentu la musa comu duci cantu
ma, sempri, chidda di lu me’ dialettu.

Dumannu scusa ad ogni prufissuri
chi giustamenti ‘nsigna l’italianu,
jò ci rispettu ‘i versi e ddu sapuri
però ‘u me’ cori parla ‘n sicilianu.