A LA ME MUSA

T’arrassi o t’avvicini a piacimentu,
passa lu tempu e nun mi veni a trovi;
chiamu e la vuci mia si perdi a ‘u ventu,
siddu c’è suli o puru forti chiovi.

Poi ti dicidi e fai na ‘mpruvvisata,
sati e m’abballi ‘n testa priputenti
e nun t’arrassi mancu si mannata,
ti queti cu la pinna sulamenti.

Ti ‘ncugni sempri chiù cu li pinseri
facènnuli girari comu rota;
‘mmischi ‘i prisenti cu chiddi d’aeri
e fai cantari ‘i versi a lingua sciota.