LU DONU D’‘A NATURA

Quannu la puisìa è dintra la menti
ci l’amu a diri grazii a lu Signuri,
è sulu opira di l’Onniputenti,
chi duna a l’omu tutti sti valuri.

Si letu senti cantari lu cori
pigghi la pinna cu lu fogghiu biancu,
cu lu to pugnu scrivi li paroli
dittati d’‘u Divinu a lu to ciancu:

pi mannari ddi missaggi d’amuri,
putiri dicantari tuttu ‘u criatu,
cu na bannera bianca di culuri,
ventu chi porta luntanu lu ciatu.

Arriva comu ‘n sonu di campana
chi chiama li fidili a la so casa
e la so vuci senti chiara e sana,
è la puisia chi t’accarizza e vasa.

Si la natura ammutta a puitiari,
nun servi chistu a cunquistari un tronu;
pi lu Supremu sulu su’ l’altari
e paci canta lu pueta bonu!

Longa è la scala p’arrivari a Danti,
nun si ci arriva certu facilmenti;
a fari versi semu tanti e tanti,
ma di dda pianta ‘un ci ristàu chiù nenti.

Perciò s’‘u versu si vesti di gloria,
l’animu, veru, si senti cuntentu;
guremu stu minutu senza boria
spargennu sta simenza comu ‘nguentu.