LI PUETA

Pinsannu a ddu prugettu, lu Supremu,
prestu ‘u pripara, ni traccia la meta;
metti na musa a ‘u latu e ‘un lu sapemu,
a lu primu ‘nguà nasci ‘u so pueta.

Puzzu surgivu pari la so menti,
nascinu paroli saggi e sinceri;
ci basta carta e pinna sulamenti
e scrivi fatti di stiornu e d’aeri.

Lu pueta canta quannu è cuntentu
e spissuliddu quannu è ‘nculluratu,
vola cu pinseri appressu a ‘u ventu,
porta cunortu a chiddu ch’è malatu.

Lu cori àvi di màttula vagnata,
sempri tènnaru, pari picciriddu;
virennu armali o genti dispirata
di certu ti va chiancennu puru iddu.

Ntâ testa nun si senti la curuna
e nesci a malapena d’‘a so tana,
a cu’ l’ascuta lu megghiu ci duna,
cu duci paroli ‘u pettu trapàna.

Tanti voti pari essiri allampatu,
si scorda tuttu, resta a cuntimplari;
ammira ‘a natura, u’ celu stiddatu
e li tramunti, puru l’albiggiari.

La rosa chi spunta nta lu jardinu,
la farfalla chi ‘ntunnu ci firrìa,
cu l’aceddu chi fa lu ballarinu,
pi fàrini un quatru scrittu ‘n puisia.

Iddu, ‘u pueta, parla a forti vuci
ad ogni omu di lu pianeta terra;
supra li so’ vrazza lestu cunnuci,
pi taliari sti biddizzi senza verra.