LI ME’ GIUIELLI

‘Un aiu avutu mai frevi di l’oru,
di supra portu appena ‘u nicissariu;
dintra, sarvatu, ‘un tegnu lu tisoru,
di certu nun disìu lu sulitariu.

Ma sti giuielli chi appi rigalati,
d’oru culatu e di granni valuri,
dintra na cascia li tegnu sarvati
‘n mezzu di lu cori cu tantu amuri.

Jucannu allura cu la fantasia,
pi sti giuielli chini di brillanti,
grapivi jò na gran giuielleria
e pi ‘nsigna tri beddi “G” giganti.

“G” comu ‘a gioia chi dannu a ‘u me pettu
quannu chi m’arruspigghiu ogni matina;
appena chi mi susu di lu lettu
e cu primura grapu dda vitrina.

Jò ddi manuzzi sentu accarizzari
e, li so’ vuci, miludiusi canti,
chi lu me cori si metti a ballari
e nun si ferma, lu giuru, un istanti.

Sti tri “G” a la porta comu stiddi,
una a centru e l’àutri p’ogni ciancu,
li me’ niputi su’ sti picciriddi:
e su’ Giuvanni, cu Giulia e Gianfrancu.